الربح من الانترنت - 85 ألف جنية فى 7 أشهر

عارف إنك ممكن تكسب من مدونتك أكثر من 10 الاف جنية شهرياً ؟
طرق الربح من الانترنت كثيرة ... لكن الطريقة دى أمتعهم ;) 

لو إجابتك نعم , يبقى الموضوع ده مش ليك وتقدر تخرج دلوقتى , لكن لو إجابتك لا زى أغلب الناس اللى بتقرأ الموضوع ده دلوقتى يبقى أهلاً بيك معانا ... إبتسم دلوقتى هتعرف إزاى ممكن تحقق من مجرد مدونة أكثر من 2000 دولار شهرياً ...

سألت أكيد سؤال إزاى مجرد مدونة تقدر تكون مصدر دخل محترم زى ده , الفكرة كلها بتدور عن ايمانك بقيمة اللى بتقدمه داخل مدونتك وهل من خلاله هتقدر تحقق أرباح ولا لا , بمعنى لو انت شايف التدوين مجرد هواية أحب أقولك انك عايش فى كوكب تانى - التدوين أصبح عمل إحترافى مش أى حد يقدر يتقنه ومش أى حد يقدر يتميز فيه . 


عايز تعرف إيه فائدة التدوين أحب أقولك إن مدونة Copyblogger أصبح رأس مالها يتعدى الـ 7 مليون دولار أميركى , موقعKissmetrics حقق أرباح تخطت الـ 5 مليون دولار السنة اللى فاتت , ولو تخطينا الحدود ورجعنا للوطن العربى مدونات كثيرة تحقق أرباح ممتازة مثل مدونة الخطة أدسنس , مدونة المحترف , والمدونة اللى انت فيها دلوقتى ...

نعم سيو صح حققت فى 7 شهور 88.5 الف جنية بما يعادل 13 ألف دولار تقريباً 

خلينى أسالك سؤال ... إنت شايف أى إعلانات فى موقع سيو صح ؟
الإجابة لا , ومش هتشوف إعلانات سواء لأدسنس أو لمواقع تابعة لي فى الفترة الجاية ده لأن المساحة اللى بياخدها إعلان أدسنس , أقدر أستغلها إستغلال أخر يجيبلى أرباح أكثر بكثير من اللى ممكن أحصل عليه عن طريق أدسنس أو أى شركة إعلانات تانية 

 خلينى بس الأول أعرفك على التدوين من منظور مختلف

على الإنترنت فى مجالات كثيرة للربح , لو كنت مصمم مواقع أو مبرمج أو سوشيال ميديا ماركتر تقدر تربح نظير العمل اللى بيجيلك وبتعمله , فى النهاية إنت دائماً منتظر الفرصة اللى هتجيلك عشان تربح من خلالها , إيه الفرق بقى بين الناس دى كلها وبينك إنت كمدون ؟ 

 الفرق بمنتهى البساطة ... إنك إنت مش منتظر حاجة من حد 

إنت بتكتب ما يحلو لك ... وبتربح من خلاله ... أيوة هو ده الفرق

 وعشان منخرجش عن موضوعنا الرئيسى , عايز تربح من الانترنت من خلال مدونتك , مفيش مشكلة كل اللى عليك هو إنك أولاً تتعلم وتتقن اللى انت بتكتب فيه , أنا عشان أوصل للنقطة اللى أنا فيها دلوقتى خدت وقت طويل جداً أتعلم وأشوف كورسات وأخد خبرة من ناس فى المجال , وأجرب بنفسى وأغلط وأصلح غلطى , أراقب الناس اللى شغالة فى المجال ده وأشوف إيه نقط ضعفهم , إيه اللى ناقصهم وهل هقدر أنا أعوض النقص ده ولا لا وهكذا ...

بس عشان أبقى واضح ومحدد هقولك ايه اللى تقدر تعمله عشان تربح من مدونتك من خلال نقاط محددة ولكن لازم قبل ما تبدئ , تعرف إن مفيش طريق مختصر , لازم تحب المجال اللى بتكتب فيه وتبدع فيه وتقدم حاجة جديدة بإختصار شوف الإنفو جرافيك ده

1 . لا تقع فى فخ التجربة

لو عايز تبدئ مدونة على الإنترنت لازم تكون قضيت وقت كافى تشوف فيه قدرتك على الإضافة للمجال ده من عدمه , لازم تكون قضيت وقت تشوف فيه المنافسين وتعرف نقاط ضعفهم وهل إنت فعلاً عندك شئ تقدمه أفضل من اللى هما بيقدموه ولا لا , مينفعش تبدئ مدونة وإنت بتقول لنفسك " هجرب " 

مينفعش تجرب بمجرد ما تبدئ لازم تكون مهيئ نفسك إنك هتبقى واحد من أفضل الناس فى المجال بتاعك إن إنت هتحقق نجاح كبير , إن هيبقى ليك سمعة وشعبية فى المجال ده , إنك هتقدر تحقق أرباح من خلال مدونتك وده عمره ما هيحصل لو بتبدئ مدونتك من منطلق التجربة فقط , لازم تحدد وجهتك وتعرف منافسينك وتذاكرهم كويس وتبدئ مدونتك وإنت بتسعى أولاً للنجاح مش للربح , متهتمش بصعوبة المنافسة لو كنت متأكد من إمكانياتك وعندك شئ مميز هتقدمه للزوار بدون الدخول فى السيو تقديمك لشئ جديد هيميزك وهيجيبلك زوار من حيث لا تحتسب

2 . إنت مش مجرد مدون

إنت مش مجرد مدون بيكتب بعض النصائح أو الشروحات فى مدونته , إنت خبير ومدرس ورائد أعمال , إنت ممكن تكون كل دول من خلال مدونتك , من خلال مدونتك بيطلع أشخاص ممكن يقدموا شئ جديد فى مجال جديد بناء على نصائحك , بناء على شروحاتك , بناء على أفكارك . ولو لاحظت كل المدونين الناجحين بيقدموا كورسات أو كتب إلكترونية , أو بيقدموا إستشارات لشركات كبيرة عن طريق الإنترنت أو على أرض الواقع 

مدونتك ليس سوى نموذج مصغر لأفكارك وخبرتك اللى تقدر تستفيد بيهم مادياً كويس جداً على المدى البعيد , لازم تعرف إن التدوين عمل وأى عمل الهدف الأساسى منه هو الربح , لكن اللى يميزك عن غيرك هو إنك فعلاً تقدم قيمة للشخص اللى بيدور عليها مقابل الربح اللى إنت هتحصل عليه

3 . متبيعش إعلانات على موقعك

ممكن تبيع إعلانات على موقعك فى حالة إن موقعك أصبح بيدخل عليه زوار كثير جداً وطلبات الإعلان عندك بقت كثيرة , ولكن أحب أقولك إن مساحة الإعلان المدفوع داخل موقعك أى كان المبلغ اللى هتدخلهولك هى مساحة مهدرة , لأنك تقدر تربح 3 أضعاف المبلغ ده من خلال نفس المساحة عن طريق التسويق لمنتج محدد ليه علاقة بمجالك , على سبيل المثال مدونة Smart Passive Income بتربح أكثر من 35 ألف دولار شهرياً من التسويق لشركة Bluehost , أيوه زى ما قريت أكثر من 35 ألف دولار شهرياً

طبعا بيستغلوا كل مساحة متاحة داخل الموقع فى التسويق لعروض الشركة وخدماتها وبناء عليه قدروا يحصلوا على أرباح تتخطى أرباح شركات هنا فى مصر أو فى بعض الدول العربية , الخلاصة إستغل مساحات موقعك أفضل إستغلال فى التسويق لعروض الشركات الكبرى والموثوقة . 

4 . أى مجال تقدر تربح منه

مفيش حاجة إسمها المجال ده مقدرش أربح منه , مفيش حاجة اسمها زوارى مش هيشتروا الخدمة اللى بقدمها أو الكورس اللى بقدمه , أنا أتفق معاك إن مش كل المجالات تقدر تربح منها بشكل كبير , لكن أى مجال فيه مساحة للربح وفيه فرص كثيرة للربح , لما تعمل كورس وتطرحه للناس ويبقى سعر التسجيل 250 دولار للفرد الواحد , مش كل الناس هتقدر تسجل معاك لكن لو حسبتها بحسبة بسيطة لو انت بتستهدف سوق بيضم 100 شخص وسجل منهم 10 بس معاك فى الكورس هتقدر تحقق اللى كان ممكن الـ 90 الباقيين يدفعوه مجتمعين لو كان الكورس سعره على سبيل المثال 15 دولار

والهدف من الكلام ده هو انك دائماً تستهدف السوق اللى مستعد يدفع عشان يحصل على معلومة مفيدة فعلاً وأنا عن نفسى بعترف إنى وقعت فى الخطئ الأول الخاص بتخفيض أسعار الكورسات وفى نفس الوقت مش ندمان على ده لأنى قدرت أفيد ناس كثير والحمد لله , لكن دلوقتى أقدر أقولك إن أى كورس مدفوع تانى سعره هيبقى مختلف تماماً عن الأسعار السابقة وده مبيبقاش إسمه طمع لكن إسمه شغل وعمل وإفادة وإستفادة متبادلة

5 . أنت لا تبيع معلومة , أنت تبيع حل لمشكلة

  لو زعلان إنك بتبيع كورس بمبلغ كبير متزعلش لأنك نظير المبلغ الكبير ده بتقدم خدمة مميزة , الناس اللى بتشترى الكورس مش بتشترى الكورس عشان تعرف معلومات وبس , لكن هى بتدفع مقابل انها تحصل على حل لمشكلتها بمعنى لو شخص إشترى كورس عن السيو هو مش شارى الكورس عشان يعرف معلومات عن السيو والباك لينكس , هو عايز يطبق المعلومات اللى فيه عشان يحل المشكلة اللى هو فيها أو يحقق نجاح من خلال المعلومات دى وده اللى تقدر تقدمه من خلال دعم فنى مباشر مع الأشخاص المشتركين معاك فى الكورس عن طريق التليفون أو سكايب أو أى وسيلة إخرى

تشوف هما حققوا إيه وتنصحهم بنصائح يقدروا من خلالها يحققوا نجاح مرضى ده عمرك ما كنت هتقدر تقدمه وتتفرغله لو كنت بتقدم الكورس بتاعك بـ 15 دولار مثلاً , وهو ده حال أى بيزنس فى العالم وزى ما قولتلك فى الأول لو معتقد إن التدوين مش فرصة عمل حقيقية يبقى إنت عايش فى كوكب تانى :))

عايز تعرف بالتفصيل إزاى قدرت أحقق المبلغ ده عن طريق التسويق لشركات الإستضافة والدومينات المختلفة , سجل بريدك الإلكترونى من هنا وهبعتلك تقرير شامل عن أرباحى خلال الفترة دى + طرق التسويق بإحترافية من خلال المحتوى للشركات المختلفة ... مجاناً ;)